陳凱琳（Grace）今日喺尖沙嘴出席活動，講到生金豬會好運，Grace就話冇聽過呢啲，但係自己對豬仔物件特別鍾情：「開始要買BB嘢啦，我乜都未買，老公連床都未買就想買玩具，佢好開心。0依家見到啲豬仔頸鏈、利是封呀，總之豬嘅物體就鍾意，想帶晒返屋企。好彩，豬仔向來都係得意，我又鍾意粉紅色，可能會搞到成屋都係粉紅色。」佢仲笑指囝囝細個應該唔介意着粉紅色，自己亦會盡量忍手唔買咁多畀佢。
Grace話早前已經影咗大肚寫真：「第一次着啲貼晒身嘅衫，我唔想太性感，可能生之前會再影多次，睇下老公想唔想陪我影，冇壓力嘅。」同老公一齊影，係咪可以性感啲？佢就搞笑話叫老公唔着衫。問到幾時復工？佢表示坐完月應該可以：「不過拍劇就應該要起碼半年先。」
腹大便便嘅Grace，透露即將停工安胎：「個肚大咗好多，0依家坐嗰陣背脊都會有啲痛。」問佢有冇度過肚圍？佢就笑言唔敢度，驚自己有壓力，不過就話自己肥咗20幾磅：「睇醫生嗰陣要磅，我想合埋眼唔睇，不過啲手腳都OK，係肥喺個肚度。」Grace又話老公鄭嘉穎都開始唔放心，所以都準備停工。
(apple daily)
