陳凱琳（Grace）為老公鄭嘉穎陀住「慈枯椗」，二人世界好快就會變三人行，鄭嘉穎由拍拖到結婚，佢都錫到Grace燶。
佢哋去年11月時宣佈有喜，有傳預產期係今年3月，照咁推算，Grace至今懷孕約6個月，不過佢身形偏瘦。
如果Grace再遲啲就上唔到飛機，所以鄭嘉穎日前趁有空檔，就帶老婆去越南芽莊享受Babymoon，有讀者Man姐日前透過《蘋果》「爆相爆片」，野生捕獲鄭嘉穎兩公婆出發同回程。
Man姐日前接受《蘋果》訪問時話：「我同佢哋一樣1月6號出發，一齊坐廉航去芽莊，又坐同一班機喺10號返嚟，鄭嘉穎戴住帽，陳凱琳化淡妝，全程見鄭嘉穎都拖實老婆，兩人邊行邊傾偈，陳凱琳雖然有咗BB，但身形仲係好瘦吓，後邊真係睇唔出佢陀B。去程上機，佢哋揀咗前排座位，好多乘客入機艙經過實見到佢哋，回程咁啱又坐同一班機，佢哋竟然着番同一件衫。」
相中睇到鄭嘉穎同老婆Grace一齊孭住背囊，但鄭嘉穎背囊插咗網球拍，睇嚟佢真係好熱愛打網球，連去旅行都不忘帶定私家拍，老婆大肚唔可以陪打，唔知鄭嘉穎喺芽莊搵邊個做對手呢？
講番佢哋呢次去芽莊嘅五日四夜行程，坐廉航係直飛最方便，如果坐其他航空公司就要轉機，由快變慢。不過Grace同鄭嘉穎都係廉航常客，Grace前年做乖乖女陪父母同細佬去日本大阪、京都旅行，負責畀酒店同機票錢嘅Grace都係揀坐廉航。鄭嘉穎同Grace舊年婚前飛布吉預支蜜月，佢哋又係坐廉航（相關新聞：https://goo.gl/7mk94o）。
（apple daily）
