現年63歲嘅導演張堅庭，今日喺facebook放閃，佢留言：「零時之後，我倆結婚足有26年了。」同時貼出同老婆楊諾思那些年「娘爆」舊相，當年阿庭有「二撇雞」鬍鬚，個樣好有趣，而太太楊諾思好似食咗「防腐劑」咁，個樣同o依家冇變。
阿庭同楊諾思婚後育有三個仔女，分別係24歲長子張高銘、22歲二女張一諾同18歲幼子張高翔，佢哋一家五口一條心，成日全家出動，隨住仔大女大，三個仔女分別喺美國工作同讀書，阿庭屋企變「空巢」，兩公婆樂得享受二人世界，咁啱聖誕新年假期，佢三隻雀仔飛咗返嚟，全家又合體。
為咗慶祝「玉婚」，阿庭今日接受《蘋果》電話訪問，佢話一家人會食飯慶祝，問到阿庭點樣維繫呢段26年幸福婚姻關係，佢話：「大家有一定幽默感，大方向要一樣，細節中適應，我好鍾意小朋友，有咗小朋友就有動力去調節雙方矛盾，我哋咁多年真係冇乜嗌交，太太要求每一日矛盾，必須臨瞓前討論解決咗佢，其實有時真係小誤會，我哋之間『大問題』好少，有好多時夫妻關係，就係忽略咗小問題，累積變咗『大問題』。」張堅庭同楊諾思絕對係圈中模範夫妻。
(Apple daily)
