李亞男同王祖藍結婚3年，婚後亞男一直都好想快啲佗B，直到今年7月宣佈造人成功！
昨日李亞男宣佈B女出世啦，佢喺IG貼出囡囡Gabrielle嘅手仔相報喜(相關新聞：https://goo.gl/Y8Nc3M)。
祖藍同鍾舒漫等昨日喺葵青為音樂劇演出，祖藍心情好靚！
一嚟到就多謝在場記者，佢話：「其實囡囡喺今個月17號出嚟，依家已經返咗屋企。」
佢透露太太係開刀生，因為要揀日子去就自己綵排：「唔好意思，因為舞台劇影響咗個女嘅生日。」
問到佢有冇陪入產房？佢話：「有，太太係半身麻醉，好好笑，醫生播住張學友《每天愛你多一些》，邊聽住歌邊開刀，感覺好似同平時做水晶甲冇咩分別，成個過程只係十零分鐘。」
佢又話因為開刀關係，醫生都已經剪咗臍帶，佢只係象徵式剪一下。
祖藍話囡囡對眼好似太太，但仍然有啲問題，佢話：「弊傢伙，個鼻同個嘴有啲似我，但女大十八變，我會祈禱佢越大越似媽咪。」
而呢幾日佢要做舞台劇，所以由外父外母照顧妻女。祖藍話呢幾日要綵排：「自己每日返到去，都趕到返去凌晨睇佢飲奶，係母乳餵哺。」
囡囡17日出世，直到今日祖藍先第一次抱女：「出咗世六日都唔敢抱，驚自己一抱就忍唔住喊，會傷到把聲。結果今日抱眼濕濕，同亞男約好咗，做完個舞台劇會好好地喊一場，出世重約7磅，肥嘟嘟好白淨。手腳好長，手指腳趾都好長。」記者話咁咪似太太，佢話：「你哋都擔心呢，我都好擔心呀。」
囡囡英文名叫Gabrielle，祖藍話係太太改，意思係天上嚟嘅天使，但中文名未諗到，但祖藍有方向：「我想同音樂劇有關，因為仲喺個肚，播流行曲冇反應，但播音樂劇就好大反應。」
至於冬至要做騷，佢話到平安夜先得閒可以慶祝一下，之後會同太太去日本：「送一個坐月旅行俾太太，好多孕婦鍾意去日本，亞男冇食刺身成年，帶佢去大擦特擦。」
問到太太復原未？佢話：「太太都仲有啲痛，要食止痛藥，見到佢睇BB個開心樣，我就知冇揀錯老婆，一定係個好媽媽。」咁幾時再追多個仔？佢都好心急：「起碼要等半年，因為開刀復原要耐啲，我都想快啲，我都老喇。」
(apple daily)
