《萬千星輝頒獎典禮2018》昨晚舉行，「最佳男主角」由現年50歲的馬德鐘憑《跳躍生命線》奪得，入行25年的馬德鐘16次提名，今次首奪得視帝寶座！
《跳躍生命線》
他上台領奬時表示：「好開心，第一次攞！企喺度感覺係吃過苦先知甜，多謝無綫、所有支持我嘅觀眾、傳媒朋友。多謝珍姐（曾勵珍），冇你就唔會有《跳躍生命線》，亦冇麥在田（角色名字），你對我講嘅嘢會記得，以往我年少無知，依家會知喇。多謝樂小姐（樂易玲），咁多年無論高低起跌你都鼓勵我，仲要多謝《跳》劇監製方駿釗、編審，以及台前幕後，大家都演得好好，所以先感動到大家。我仲要多謝屋企人，相信爸爸喺天上面睇到，多謝我個仔，佢帶畀我好多快樂，多謝我太太，佢照顧得我同屋企好好，做藝人太太唔容易！」
感觸最深嘅係馬太張筱蘭。12歲就同馬德鐘相識嘅佢，當老公勇奪視帝寶座後於社交網發文，指本身為G4（要員保護組）警員嘅馬德鐘用足1/4世紀去證明畀自己睇佢係冇轉錯行！
太太張筱蘭首先恭喜老公攞獎，之後佢又講到其實自己一直都好相信老公嘅決定，話好慶幸可以同佢㩗手經歷過咁多，仲提醒老公要時刻保持感恩的心，回饋社會。字裏行間馬太張筱蘭真係非常感動，兩人廝守整整38年，同甘共苦，今次老公終於吐氣揚眉，好多觀衆同網民都替馬生馬太好高興！
原文如下：
「恭喜你成為視帝！雖然你要用1/4世紀才能證明我知道你是沒轉錯行，但我內心一直相信你的決定是正確的。非常感謝你不斷的努力和付出，願意改變自己，踏實地做好這專業，謙卑地接受生命。希望你能繼續自強不息，厚德載物。每天精進自己之餘，時刻保持感恩的心，用智慧和勇氣去迎接日後更多的挑戰，回饋社會。非常慶幸能與你㩗手經歷生活中發生的所有事情，無論是痛苦或美好，一切都是最好的安排！」
(綜合報道 / on.cc)
