早前宣布懷孕的藝人陳凱琳（Grace）現身眼鏡活動，身穿鬆身裙的她已見腹部微隆。
Grace稱現時仍有妊娠反應，會不時嘔吐，問到有否影響工作？她說：「都ok，習慣咗，知道要少食多餐，好過一次食太多。（口味有冇變？）有，我以前係甜品人，老公成日話我甜品當正餐，依家食多咗飯、粥，同啲有營養嘅食物，可能BB話媽咪糖分已經好夠。（重咗幾多？）10磅，我好易吸收，醫生話係正常，BB係中碼。」Grace透露已獲不少朋友送贈BB衫，至於已為人母的好姊妹有否將舊衫送BB？她坦言：「啲人話舊衫係祝福，我唔介意，仲覺得好好添，不過我未公布BB性別，所以未問人攞。」
Grace指現正處於放假階段，除了出活動外，有不少時間煲劇。問到嘉穎出埠工作，會否擔心她，她坦言：「都ok，佢知我身邊有人照顧我，佢都放心。（每日打幾多次電話？）佢去機場打一次，去到機場又打，上機又打，我話我仲係同一狀態喺髮廊，佢好sweet。（黃智賢讚嘉穎乖咗好多？）哈，我要出活動前問定佢講咗乜，係乖咗，照顧周到咗，不過佢以前都好乖。」
她自言：「我今日喺IG放咗張BB相，個BB望住自己嘅肚腩，就好似我嘅感受咁，好得意。（有咩感受？）好神奇，雖然都見過身邊朋友大肚，但我依家終於明白個感受，我嘅五舅母最近生咗孖仔。」
「（你係咪孖胎？）唔係。」
提到之前Grace老公鄭嘉穎在活動上指胎兒性別由她負責公布，Grace笑謂：「佢又拋番個波畀我，之前話一齊公布，佢依家飛咗去馬來西亞工作，等佢回來我哋約咗幾個朋友食飯，到時會同佢哋講，跟住再公布。因為嗰幾個朋友係親友，佢哋都未知BB性別，想尊重番長輩意願，唔想佢哋要睇報紙先知。」
(on.cc)
