【原來一早已經⋯】陳展鵬笑笑口承認

陳展鵬同單文柔（Phoebe）於上月13日成婚。估唔到新婚只係一個月，Phoebe就率先宣佈有喜，兩人將會做豬爸豬媽。其後展鵬亦在社交網站報喜：「Baby is coming。」

一額汗？咁有咩嚇親見慣大場面嘅視帝呢？陳展鵬解釋：「其實好多朋友都問過我，究竟結婚先定有咗先，其實我唔係machine，放咗嘢入去就跌啲嘢出嚟，其實係同籌備婚禮同一時間知。」

陳展鵬又話一早暗示咗大家聽：「今年年中我接受訪問，話想結婚，以為大家已經知道我暗示咗隨時ready有喜。」

陳展鵬今年8月同Phoebe喺英國影婚紗相，佢話都係呢段時間先知Phoebe有咗，仲話老婆當時其實好辛苦：「有諗過公開咗先定點，但果時Phoebe幾辛苦，雙方家長又怕BB小器，所以瞞住先。」佢話老婆當時唔講得，但又成日請假，佢都擔心其他人以為老婆結咗婚唔想再返工。

展鵬表示多謝公司上下體諒：「我冇所謂啫，老婆係新人，不斷推工作，好彩啲監制好似知道咁冇怪佢，依家終於可以講得嘞。（想生仔定女？）我冇所謂，不過老婆就想係仔，佢好似覺得同我組織家庭之後，要有個仔傳宗接代。（話唔定打孖嚟。）咁要幾個月後先知，小朋友我ok㗎，依家好似叫胡咁，話唔定我三年抱兩！」

展鵬又指太太身孕約3個月，目前已「見肚」：「佢平時揀衫靚，我都佩服佢。（預產期呢？）出年4、5月，會喺香港生。（你媽咪好開心？）由我結婚已經好開心嘞。（老婆以後湊B？）睇佢意願，我知佢想做嘢，入行兩年咋。」

陳展鵬估計，無錯，係估計老婆有咗3個月，但佢又透露預產期喺4、5月，會留喺香港生，佢又話老婆平時都有小肚腩，但依家都開始見肚。至於想有囝囝先定囡囡先呢？陳展鵬話仔女都得，不過老婆想傳宗接代，希望有囝囝先。

(綜合報道)