羅天宇去年尾同湯洛雯分手後，兩人似乎欲斷難斷，日前羅天宇大搞31歲生日派對，湯洛雯竟然出席為舊愛慶生，唔知係咪復合在望呢？
不過，早排羅天宇現身旺角街市嘅熟食中心打躉，被讀者黃先生透過「爆相爆片」分享，同行有位長髮女仔，但並唔係湯洛雯。
讀者黃先生在電話表示：「嗰晚7點幾，喺朗豪坊對面街市熟食中心，見到羅天宇同大隻仔（溫家偉）喺度打機，我諗因為佢哋做過《愛．回家》，所以好多人認得眼望望，但佢哋冇理會，全程掛住打機…」
「仲一路打一路研究討論，冇工開都唔愛回家，同枱仲有個女仔喺度玩iPad，佢哋打機打咗成粒鐘都未走。」
對於被讀者笑冇工開都唔愛回家，羅天宇回覆傳媒表示：「我哋等緊人去做gym，喺附近嗰間24小時健身中心，因為嚟緊要拍新劇，趁有時間增值自己，咁我哋就到嘅話都會約埋一齊去做gym。」至於同枱女子身份，由於讀者影唔到樣貌，問到女仔係咪圈中人？羅天宇好坦白表示：「佢係范彩兒，我哋係同期訓練班同學，識咗十年，大家都係好好嘅朋友。」
范彩兒同羅天宇一樣係31歲，佢中學畢業後讀大台藝員訓練班，在處境劇《依家有喜》飾演護士「蘇哥莉」為人熟悉，但都唔夠佢嘅出衆身材出位，經常喺社交網上載性感相。
因大多飾演宮女丫環角色，故4年前離開大台轉戰大陸發展，仲做埋健身教練；由於大隻仔已有混血親親女友，而羅天宇同湯洛雯分手後未再拍拖，問到同范彩兒有冇發展機會？羅天宇一口拒絕：「冇.. 我哋係好好嘅朋友。」
(apple daily)
