除咗花旦小生空群出動外，昔日合作過嘅圈中好友紛紛到賀，包括宣萱、林峯、吳卓羲、胡杏兒、陳慧珊、陳鍵鋒、馬國明、周勵淇、梁漢文、汪明荃、謝天華、楊怡、羅仲謙、陳煒、朱晨麗、湯洛雯、朱千雪、高海寧、陳智燊、宋熙年、王君馨、黃智賢、阮兆祥、陳國邦、羅敏莊、孫慧雪、湯盈盈、楊明、莊思明、陳庭欣、導演杜琪峯、監製梁家樹、李添勝、梅小青、劉家豪、德哥昔日訓練班同學談泉慶、賴水清等等，場面熱鬧過無綫台慶。
人稱德哥嘅無綫監製潘嘉德，人緣一向極好，昨晚佢喺中環一間酒家擺70大壽壽宴，筵開35席。大約夜晚8點，德哥出嚟影相，佢話今日只係請吓朋友食飯，多謝傳媒朋友。之後阿姐汪明荃到場時，德哥更親自出嚟迎接，兩人互相祝青春常駐同互攬。
德哥係無綫第4期藝員訓練班畢業生，同期同學有杜琪峯、黃杏秀等等，但畢業冇幾耐，德哥就轉去幕後發展，80年代尾開始喺無綫擔任監製，作品包括《卡拉屋企》、《刑事偵緝檔案》、《鑑證實錄》、《衝上雲霄》同《On Call 36小時》等等，係無綫金牌監製。
不過效力無綫43年嘅佢，最終係今年5月退休離開娘家。
跟潘嘉德合作多次的宣萱表示最難忘是劇集《刑事偵緝檔案VI》，亦造就她第一次奪得視后：「佢為人好隨和 ，成日處於好開心嘅狀態，而且肯起用新人，都提攜過我好多次。（相處最難忘係咩？）佢直腸直肚，話我個口太大，笑嗰陣唔好擘咁大個口，佢講野好直接。」周勵淇表示只跟潘嘉德合作過一次《流氓皇帝》：「佢個人好開心，第一次見到我就話一定要合作拍套劇，佢畀人感覺成日都係好nice！」
近年主力喺內地發展嘅陳鍵鋒都有現身，加埋同場嘅吳卓羲、林峯以及馬國明，就係當年無綫古裝劇《少年四大名捕》嘅經典組合！近年四位小生各散東西，難得可以再聚首一堂，梗係把握機會合照留念，即令網友紛紛表示回憶返晒嚟，不過就有網民笑指呢張合照仲少咗一樣嘢，就係輪椅，事關「無情」林峯喺劇中以輪椅代步，如果有埋呢個道具就真係「神還原」！
(蘋果日報/on.cc東網)
