38歲嘅胡杏兒15年約滿大台，隨即簽約蕭定一旗下嘅中國3D數碼。
3年賣身契約滿，杏兒決定唔續約，據知「視后」杏兒當初加盟，主要想由視圈跳入影圈，開拓電影巿場，但係佢入咗公司咁耐，只係拍大陸劇多，加上去年生仔，及至今年先獲安排同古天樂、吳鎮宇同張智霖合演電影《死亡通知單暗黑者：首部曲「雙雄會」》(暫名)，電影主線都落係男仔戲度，難怪杏兒感到失望，所以約滿即同蕭定一「拜拜」，回復自由身嘅杏兒自組新公司「東方新星」，仲喺觀塘租咗office。依家自由身，杏兒仲可以隨時造人，為老公追番個女，同囝囝李奕霆（Brendan）湊成好字。
胡杏兒約滿唔同蕭定一續約，佢哋今午一齊向傳媒發咗聲明，內容如下：「胡杏兒與 hmv數碼中國集團所簽訂的三年經理人合約近日已告屆滿。過去三年來，雙方合作愉快，並感謝各界的支持及關心。就杏兒約滿一事，今日 hmv 數碼中國集團主席蕭定一和杏兒發出聯合聲明，一次過作出回應。」
胡杏兒話：「主要是因為我在家庭及工作上會有新發展，所以不續約，而公司亦支持。其實公司一直有開拍電影及劇集，只是覺得不適合自己而沒有接拍，但公司仍是我的最好夥伴，未來大家還會有其他合作。」而蕭定一則話：「我們和杏兒曾經斟洽過多部電影演出，最後雙方認為《死亡通知單暗黑者：首部曲「雙雄會」》(暫名) 比較適合，所以只拍了這部戲。我們私下是好朋友，大家往後都會繼續合作。」
(蘋果日報)
