余文樂早前因為要飛法國工作，連愛妻王棠云正日生日都唔可以一齊過，但佢去完法國後原來仲未返香港，而係飛咗去日本。
噚晚仲好happy咁喺Ig放咗幾張影住壽司嘅相，然後留言「So yummy」，搞到唔少網民流晒口水，好鬼羨慕。
點知相隔咗17個鐘頭，樂仔今日10點幾就係Ig貼咗一張，相信係攝於醫院病床嘅相。樂仔張相冇影自己個樣，只係影住佢粗壯嘅手臂，手臂上就貼咗兩塊膠布，同埋一條用膠布貼住、用嚟吊盬水嘅膠喉，即刻有網民估佢係食咗唔乾淨嘅壽司「出事」！
但係樂仔只係貼咗一張相，冇解釋點解忽然會瞓咗喺病床，只係留言話：「日本初體驗」，所以究竟係食物中毒定腸胃炎就唔知喇！不過，見樂仔仲可以上網同影相，應該都唔會好嚴重嘅！
(apple daily)
