祖藍好坦白話係會啲有困難，不過祖藍都有抽時間照顧陀緊b女嘅李亞男，亞男亦好支持老公，而羅敏莊就笑笑口話：「我哋全程照顧，做埋阿四斟茶遞水。。。」
由王祖藍首次執導嘅賀歲電影《你咪理我愛你》o依家正進行拍攝，話晒係處男下海，祖藍今次碌盡人情咭，一口氣搵咗差唔多60人參與拍攝，再分別拍成多個小故事，日前陳國邦、羅敏莊同埋陳禛，一家三口喺西貢一間獨立屋拍攝。
呢個故事由改篇成歌舞電影，祖藍好坦白話喺拍攝方面會啲有困難：「難度高過正常一部戲，當動作片咁拍，時間同資源上係大挑戰，不過香港電影人最勁嘅地方就係乜都做得到。」雖然拍戲好忙，不過祖藍都有抽時間照顧陀緊b女嘅李亞男，亞男亦好支持老公，間中到片場探班：「佢有好好安胎，有時返到屋企佢仲會一齊唱歌同幫手。」
雖然有唔少電影人認為小朋友同寵物都係最大嘅對手，不過呢啲問題唔會發生喺陳禛身上，深得父母遺傳嘅陳禛，出鏡冇怯場，對白和舞蹈好快記得晒，只要俾佢培養一下情緒就可以正式埋位，羅敏莊笑笑口話：「對阿女嚟講拍戲係冇分別，好似玩咁樣。如果佢做嘢，我哋全程照顧，做埋阿四斟茶遞水，冇阿女一齊做，我哋專業做番演員，依家就要兩樣兼顧難啲。」
不過陳國邦話好享受一家人喺一齊嘅時候，難怪阿女錫晒爸爸，讚佢係全屋唱歌最好聽嘅人。
(蘋果日報)
