朱茵、張繼聰、莊思敏、沈震軒等，昨晚喺銅鑼灣出席電影《古宅》首映禮，朱茵表示部戲年幾前拍，見番戲中嘅小朋友大得好快，仲認得，問到佢係咪喺片場唔敢瞓？朱茵話︰「係呀！因為全場都冇燈，好昏暗，過咗日頭會好黑，仲會冬暖夏涼。」問佢有冇見到污糟嘢？佢話︰「我都唔會亂搞或亂望，以尊重嘅心態，都冇事嘅。」不過佢話拍攝時，係有啲唔自在，因為現場係一間有百年歷史嘅大宅，雖然佢信教唔會拜神，不過有啲情況佢都會收利是。
問到會否帶囡囡黃鶯去睇戲，朱茵話︰「佢今日見到啲飛，都問我有冇份，我話冇份，佢又問點解。套戲係驚慄片，又要解釋一輪，仲問媽媽做乜嘢，好多嘢問。但唔可以畀佢睇到，因為我抱人哋BB，佢都唔得，有時見到我喺綜藝節目被蝦，都唔得。」問佢會否追多個？朱茵表示要睇緣份，是否有計劃？佢就話︰「冇嘢係有計劃。」
講到早前同囡囡拍嘅大陸綜藝節目《想想辦法吧爸爸》，是否延播？朱茵表示唔清楚，佢自己都好想睇，想睇番老公點樣湊女。有傳佢收千萬酬勞？佢就話︰「要問番公司，對我哋嚟講好難得，係一個紀念，唔計較幾多錢，最重要係一家人。拍之前個女同爸爸冇咁好，見到爸爸仲踢開佢、嫌棄佢，依家睇到爸爸嘅偉大，信任爸爸。」有傳延播因明星消費仔女，佢只表示期待睇。
張繼聰自言今日化身保安護住朱茵，但朱茵老公黃貫中都在場，問阿聰朱茵是否其女神，阿聰話︰「我哋呢一代冇人話唔鍾意佢，大家都係演藝學院校友，讀書時佢已經好紅。我哋第一日開工見面，就拍一場感情戲，之後我fans行為出晒嚟，話畀佢聽好鍾意《都市的童話》，呢部係佢第一部劇，好多幻想空間。」至於老婆謝安琪冇嚟過探班，因為地方偏遠。如果拍驚慄片都唔驚就死啦！拍呢套戲都驚，唔驚就死。」而部戲講母子情，為人子女要體諒父母，「其實個仔好醒目，佢會話畀阿爹知，帶佢去睇恐怖片，所以瞓唔着，唔使瞓，佢好識射波。」
(蘋果日報)
