升呢父母嘅藝人，當然家庭為重，要家人得到健康，就要先從飲食開始。收身成功嘅新手媽咪吳雨霏（Kary）同陀住第二胎，挺住巨肚嘅謝天華太太李天恩（Tina），佢哋日前不約而同去咗渣甸山間超巿買餸，兩位靚媽都為家人煮餐好而出動。
今年6月，一索得男嘅吳雨霏（Kary），已經坐完月，可以自由活動，收身成功嘅佢日前素顏同老公洪立熙（Brian）孖咇到超巿，喜歡潮人打扮嘅Kary，着住黑色高衩連身長裙，老公Brian就白裇衫，兩公婆黑白配，襯到爆。其實Kary產後一直深居簡出，及至日前佢有到盧凱彤靈堂送佢最後一程，之後又未有再露面，看來Kary樂得把時間都花在囝囝身上。
當日下午4時許，Kary同老公Brian去到超巿，Brian帶定寫下要買東西嘅紙仔，佢逐一放上手推車，佢哋揀咗水果同日用品，放滿一車便去畀錢，Brian推着車到停車場，而收了身嘅Kary輕鬆兩手揈揈，佢條連身裙係鬆身款。Kary夫妻冇帶囝囝出去濕平，所以可以專心選購東西，Brian將東西放車尾箱時，Kary分工合作拎起取回嘅乾洗衣物，臨走時，Brian禮貌打招呼，Kary也點點頭。
其實，超巿內仲有一家「四」口掃貨，佢哋係謝天華同46歲大肚太太Tina同約3歲囝囝謝浩飛（天天），謝天華今年4月開心報喜老婆再有喜，日前見到Tina個肚又圓又大，佢為安全都着平底鞋，佢哋去咗買雞蛋同水果。
當Tina專心揀嘢時，天天突然活潑叫嚷，媽咪馬上向囝囝叫停，謝天華也踎低勸止，天天非常聽話，睇嚟佢哋平時家教都係講道理，佢哋買晒嘢都去埋單，謝天華負責把東西放入車尾箱，Tina就拖實囝囝。因為佢哋架車泊邊位，所以謝天華先開車出嚟，先畀老婆同囝囝上車，當時停車場都好繁忙，佢架車有頂住後面，謝天華都猛示意不好意思。兩個都咁錫老婆，真係唔話得～
(蘋果日報)
