藝人張繼聰經常喺社交網晒出囡囡張靖（Karina）嘅可愛片段，每次出post必定成功呃like。Karina不但cute爆，而且仲好精靈，細細個未夠兩歲就已經識扮動物叫。另外，開始牙牙學語嘅佢，叫張繼聰時竟然唔係「爸爸」，反而係……！
片中，張繼聰問囡囡貓、狗、牛等點叫，Karina就好叻女咁扮出動物嘅叫聲，當張繼聰問到：「咁爹哋點樣叫呀？」Karina竟然回答：「阿聰。」冧爆嘅張繼聰聽到後即時笑到收唔到聲，認真搞笑！
唔少網民大讚Karina人仔細細已經咁醒目，簡直遺傳晒爸爸嘅精叻頭腦！
(on.cc東網)
