昨日一度發出黃色暴雨警告信號，本來中環雨勢唔算大，但鄭生鄭太——鄭嘉穎同陳凱琳兩公婆一到，就忽然變得好大雨。
琴晚鄭嘉穎同陳凱琳係首次婚後夫妻檔現身，黑白配儼如婚禮延續。兩人一到場即落大雨，工作人員本來準備一人遮一個，但雨勢持續好大，結果鄭嘉穎同工作人員講：「不如你俾把遮我啦。」於是一手攬實太太，一手撐傘，man到爆，亦都好sweet，但兩人仍難免一身濕晒。
影完相，鄭嘉穎亦十分緊張，幫太太抹乾身上雨水，以防著涼。受訪時陳凱琳話好開心可以一齊出活動，鄭嘉穎就話嚟緊應該仲有，但就貴精不貴多啦。至於酬勞，鄭太就答OK啦。係咪當家用？佢話：「家用我哋係一齊用0架。」但鄭嘉穎明明之前話賺到嘅所有錢都俾晒太太喎！此時嘉穎插咗句：「你哋多事啦！」
鄭嘉穎解釋話：「因為太太唔識『當家』係乜嘢意思，咁我就同佢講，我以後負責俾錢，你負責管錢。」當一講到「太太」呢個Term嗰陣，兩公婆都忍唔住大笑，而且係咁嗌打冷顫。鄭嘉穎話：「佢係好知慳識儉，所以我好放心交盤數俾佢管。因為佢好精打細算，冇得頂。」100分？「如果可以俾超過100分，我都會俾。」
陳凱琳就話噚晚下廚蒸水蛋，但蒸過頭起泡泡，鄭嘉穎就好溫柔咁同太太講：「唔緊要，我幫你食晒佢。」佢就為太太解畫；「佢唔係成日煮，煮得多先會煮得好。今次如果我唔鼓勵佢，咁我以後就冇得食。希望佢可以從錯誤中學習啦。相信佢下次一定蒸得到。」
至於度蜜月，兩公婆仲夾緊時間，地點已定。咁生BB呢？佢哋就話呢份係上天嘅禮物。對於老友杏兒早前踢爆你鍾意女喎，鄭嘉穎笑：「仔女都鍾意。如果第時生咗個仔，個仔會唔開心，所以都係公平少少。最緊要似媽咪。」陳凱琳一聽到，都好Sweet咁答：「似爹哋都好0架。」是否準備生兩個滿足老公心願？「冇得咁計嘅，睇下天父點俾啦。」但好開心知道老公仔女都鍾意，冇壓力。
（apple daily）
