陳凱琳（Grace）同鄭嘉穎星期日（12日）喺印尼峇里結婚，噚日先落機返香港，一見到傳媒兩人已經十指緊扣，冧到暈。
休息一晚，Grace已經復工，喺尖沙嘴出席YSL彩妝活動，佢穿上紅色貼身晚裝，話婚後喺當地玩咗幾日，都有休息過，工作番都好開心。佢都係嗰句，未慣被叫鄭太，聽到會感覺好生外。問到嘉穎o依家會點叫佢，Grace話：「都係叫我Grace，不過有時都會改口叫我鄭太，我都叫番佢做鄭生，有時叫佢老公，有啲感動同毛管恫。」
返香港後，兩人噚日唔係去新居瞓，而係去咗酒店住，唔通係造人？Grace解釋：「其實我同嘉穎都想relax下，如果住酒店就有人照顧。」咁係咪新居未裝修好，佢話：「唔係，遲啲會住。」講起小朋友，佢就話：「其實都有傾過，大家都想行呢一步，順其自然啦，同佢都有共識。」咁o依家係咪不設防努力造人呢？Grace就面紅，尷尬笑：「哎呀，唔好問我啲咁尷尬嘅問題啦。」佢又話唔會喺香港再擺酒，但會同啲姊妹食飯。
Grace一直都冇講過嘉穎點求婚，今日佢終於講番喇！佢話：「上年12月同嘉穎返加拿大，佢喺機上求婚，仲跪地添。個位好窄，佢都跪地。因為係長途機，佢叫我唔好瞓覺，但我趁嘉穎去咗廁所咪埋眼恰一恰，佢返嚟時叫我打開對眼，我一打開就見佢跪咗喺度，有戒指有跪地，當時真係感動到喊，覺得係好大驚喜，覺得佢好用心。」
(蘋果日報)
