43歲天后李玟(Coco)今年剛好入行25年，走過四分一世紀的歌手路。她上周難得回港受訪，坐在Lane Crawford的VIP房內，輕鬆講講心底話，回想93年新秀時的歌星夢，與今日仍未成功的打針造人大計。Coco總是開懷大笑，「低潮期絕對有，我都係一個普通人，但我選擇唔去諗遺憾，我會同自己講：You will be OK！」看老人廣告可以哭得一撻糊塗，樂觀背後，李玟其實也是擁有超強意志的感性女人。
單親培養堅強樂觀
經常笑面迎人，樂觀、自強不息的性格原來和她單親家庭長大有關，「我出生前，爸爸已經過咗生，媽咪一個女人要養大三個小朋友，好辛苦，She did it! 有幾苦都不要害怕，you can overcome。」
Coco非常有正向快樂的感染力，「先天後天都有，可能我係屋企最細，我鐘意扮鬼扮馬令到身邊人笑、開心，見到媽咪開心我就會好溫暖、好開心。後天，我覺得一切都係一個態度，樂觀係一個自己的選擇，你可以選擇開心，亦可以選擇唔開心，全部睇你自己點揀。」
18歲新秀歌星夢
Coco在參加TVB新秀歌唱大賽，獲得亞軍入行，今年剛好25年，走過四分一世紀的歌唱事業，當中的超亮點，包括：2001年憑「臥虎藏龍」的《月光愛人》獲奧斯卡提名最佳電影歌曲獎、2016年參加《我是歌手》成為總冠軍。
問她三個成就只能三揀一，會怎樣揀？「嘩，好難揀！唔…我可能會揀新秀，嗰時我18歲，我對我的世界、未來乜都唔知，只係知我好鐘意唱歌，對舞台好有feel，I feel for the stage，但唔知自己係咪made for the stage？因為當日參加咗新秀，我先有今日的機會成為歌手，由一個想像的畫面，變成真實。」
美食Shopping減壓
她的歌手路走得很順利，成為天后也嫁給愛情、和富豪老公Bruce結婚，巨星朋友滿天下，有否試過失意低潮？「低潮期絕對有，我係一個普通人，但人生係full of up and down，低潮時怎樣面對，我會不斷同自己講：you will survive！就算個結局唔好、係壞的，我都會接受，不會覺得係遺憾，而係當一堂必需上的課。」
當然也少不了美食兼shopping的減壓治療，「我好鐘意食嘢，唔開心時，就會食啲令我開心的嘢，好似波蘿油、雪糕，咁當然食完開心完，第二日要節制番。同埋，我好鐘意去買鞋，我係大腳八，我鐘意買啲好多好靚的鞋，但如果唔舒服我就唔著，有點曬。」
天賜禮物不可預期
上一次流淚不可以講，但Coco坦言自己是一個易喊的感性女人，好友失戀會一齊喊，看到相濡以沬的老夫妻廣告會不停喊，因為寫歌創作，就是需要敏感的一面，「最近去完朋友在法國的婚禮，在古老的堡壘入面，我成日聽到個大鐘每15分鐘就噹一次，帶咗俾我新歌的好多靈感，人生其實就好像時鐘咁，噹噹噹咁不斷過。」
人生的下半場，Coco坦言不想預期太多，只想活在當下，老公Bruce有兩個女兒，Coco亦希望和老公有愛情結晶品，今年四月，她公開承認做人工受孕，上天的禮物亦是不可預期的，「順其自然，如果有呢個緣份，會發生的！如果無，It’s Ok too。」
(蘋果日報)
