葉翠翠今日開心喺facebook貼相，宣佈小小王子今日滿月，唔少佢嘅fans都留言恭喜。
不過，連日翠翠都在其facebook專頁同網民「唇槍舌劍」，有網民仲覺得翠翠同網民對罵，涉網絡欺凌同人身攻擊添！
還原番件事先啦！其實成件事始於上周二翠翠喺facebook指家傭用手搣大仔「小王子」的鼻，令佢好唔開心。
唔少網友都留言撐翠翠，但亦有網民批評翠翠，認為佢過份緊張，有人甚至批評她「香港小姐冠軍咁無品」、「做藝人做到咁小家」，翠翠亦不甘示弱，還擊回應「o依家網絡都有好多病患者」。
翠翠今日接受傳媒電話訪問，佢認為做藝人唔代表要任意俾人攻擊。佢話：「其實網民一直講嘅嘢我都唔理，之前有網民叫我夠膽就去唔知邊個討論區回應，但係我點解要去回應？今次唔同，你喺我個page度留言，就預咗我會回應啦，咁點解回應你，你就要咁玻璃心呢？」
有網友批評翠翠「無品」及「小家」，她反撃對方為青山病患者。
對於有人認為佢直斥網民涉網絡欺凌，佢又點睇？翠翠話：「好多人為咗攻擊而攻擊，我講個仔畀工人搣都唔得？平時我post下個仔嘅相又話我晒命，係咪好奇怪？你話我就得，我話你就唔得？我覺得係低B，我咪話佢低B囉，我覺得佢有病，咪話佢有病囉！」
翠翠笑指網民留言低b！
翠翠仲話：「藝人唔係人咩？唔係人嘅類別？好似我做30分鐘直播就畀人鬧唔自己照顧個仔，我已經為咗佢哋無返工，劇都冇拍啦，咁唔通請工人嘅就唔啱？最搞笑係有人話我，點解叫個仔做小王子，我真係覺得好好笑，係咪我畀人欺凌呢？」
唔少網民都撐翠翠，部份更為佢護航同女網民對駡。
睇完成件事，只可以話大家上網可以揀啱睇嘅嘢，唔啱睇就唔好睇！睇完又要嬲，何必呢！
(APPLE DAILY)
