陳志雲《志雲尋志雲》登陸舞台演嘢會噚晚喺賽馬綜藝館舉行尾場，完騷之後去咗尖東舉行慶功，講到志雲喺台上自爆當年為咗謝安琪而俾方逸華鬧。
方逸華（左）（資料圖片）
佢就話：「當年安排謝安琪做節目，方小姐留意到點解成日都係呢個女仔，跟住我當時都好欣賞張繼聰，安排佢做《味分天下》，方小姐又話做乜成日要搵呢兩公婆，係唔係淨係得佢哋，不過佢都係話下啫，我通常唔駁嘴，解釋俾佢老人家都會聽。」
謝安琪、張繼聰一家 （資料圖片）
之後志雲又話：「最深刻一次做港姐騷，喺紅館做港姐騷，方小姐拉我去角位叫我睇下個台，問我點睇，其實我哋做電視，主要係點睇個螢幕，有啲地方係睇唔到，佢話唔理，叫得人嚟睇就唔可以咁樣，所以以後港姐舞台都要佢過目。」問到o依家港姐係咪質素低，志雲話唔會，不過o依家選出嚟邊個叫咩名都唔知，志雲揶揄余詠珊話：「我有留意到余詠珊講，佢話好精彩，但係機制就未知，可見傳媒千變萬化好難做。」
今屆20強佳麗誕生
喺騷上陳志雲同王喜玩結婚， 陳志雲笑言下次搞離婚， 王喜話最近見得志雲多，覺得好討厭，王喜話：「過往我哋唔多見面，就算同一條街都好少見，因為單官司先至成日見到。」之不過喺個騷裡面，王喜嘅扶靈名單唔寫上陳志雲嘅名字，王喜笑言唔知邊個捱到最後。
陳志雲稱與王喜有緣份 。
陳志雲就話，死後唔會舉辦喪禮：「我冇兒冇女冇親人，搞嚟俾邊個拜，骨灰都唔需要特別地方安放。」陳志雲話同王喜緣份好特別，佢話：「我媽媽過身嘅日子就係佢生日，佢爸爸個名同我個名一樣，我爸爸過身嘅日子就係我生日。」
（apple daily）
