宣布有喜後的李亞男，今日首次露面，着咗條鬆身紅色吊帶牛仔裙，由幾名工作人員陪同下，到書展出席新書活動。
身材微隆嘅亞男全程笑住口，問佢可唔可以摸住肚影相，雖然佢笑稱：「依家都冇乜嘢睇，得個肚腩仔。」不過影相時都有摸肚、指一指個肚，兼做出心形手勢，笑不攏嘴。亞男表示，除期待新生命外，另一BB《暖．男廚房》，亦於今日「出世」，版權及收益會捐出。
腹中胎兒是仔是女？李亞男甜笑：「過咗3個月，好感恩冇嘔，淨係覺得攰，所以成日瞓。」胃口有冇改變？「有呀，我以前唔食麵，王生（王祖藍）就好鍾意，唔知係咪似老竇，依家都變成鍾意食麵。」
至於BB性別，已照超聲波嘅亞男就話：「遲啲先公佈，我希望係一仔一女。」她稱同祖藍都覺得仔女冇所謂：「最緊要係BB健康，唔好似佢。大家講笑咁講，最好有番我少少嘅高度，不過OK嘅，如果似佢，都係靚仔或靚女。」造人成功，祖藍可有何慰勞？李亞男話：「陪咗我返加拿大見Daddy、Mummy，因為佢好難先放到假，今次過去最主要都係報喜。」
至於現時同樣有咗嘅好朋友鍾嘉欣有冇畀貼士？「佢同我講最緊要係有健康同快樂嘅生活，因為可能係鬼妹，所以都冇乜煲湯水，所以佢覺得最重要都係開心。」
李亞男又透露，（即將）為人父嘅祖藍好緊張：「佢今日叫晒公司所有人嚟陪我，我第一次照超聲波嗰陣，雖然佢面容扮冇事，但佢見到個圖就唔知點咁。」
李亞男表示計劃BB會喺香港出世，但因為王祖藍之後好忙，搞到亞男都唔知自己應該順產定開刀：「我預產期係12月或1月，都幾疊住佢舞台劇時間，所以都要睇王生個期係點，到時先再度順產定開刀。不過我暫時諗都係開刀，但都要睇吓到時自己母性係點。」
(蘋果日報)
