張頴康透露自2006年起加入無綫後便發現：「當時拍緊劇集《王老虎搶親》，關節腫到要入醫院，當時檢查咗幾日都唔知咩事，後來先知係。。。」
藝人張頴康近年劇接劇密密做，但原來佢一直被俗稱「牛皮癬」嘅銀屑病所困擾，直至近年病情先逐漸受控。佢早前為銀屑關護會拍攝短片親述病況，呢日再喺社交網發文，指以往因為怕其他人嘅目光而唔敢着短衫短褲，佢提到：「今日去健身室做運動嘅時候，諗番起一年幾前，每次去健身室都係要着長衫長褲！着長衫長褲，唔係因為要焗啲汗出嚟，而係要遮住身上面一撻撻嘅紅印！」
佢續指：「呢一年嚟，我嘅銀屑病已經控制得好好，已經去到PASI 90，可以喺夏天嘅時候着短衫短褲出街，可以去海灘游泳池游水，無需要再理會其他人對我嘅目光！」
張頴康接受東網電話訪問時透露，自2006年起加入無綫後便發現患上該病：「當時拍緊劇集《王老虎搶親》，關節腫到要入醫院，當時檢查咗幾日都唔知咩事，後來先知係銀屑病，要靠類固醇同曬太陽。」
去年開始惡化
他指去年出埠拍攝劇集《天命》時病情開始惡化﹕「因為要出埠拍劇，心情唔係咁好，又有壓力，所以就飲酒舒壓，令病情復發兼嚴重咗，我返到香港就醫，打咗生物製劑同戒酒，兩三個星期就控制到病情，花費唔平，頭一個月就用咗五萬蚊，因為第一次劑量比較重。」
太太無限量支持
問到太太麥雅緻如何支持他，他笑謂﹕「佢最初都唔知我乜事，仲問我係咪因為滾所以搞成咁？我話梗係唔係啦，佢有上網搵方法幫我一齊對抗病魔。呢個病係冇傳染性，但有遺傳性，我嘅爸爸同爺爺都好似有，而且係傳仔多過傳女，所以當我得知第二胎係仔嘅時候都有擔心過，希望佢冇事啦！」
其實PASI（Psoriasis Area and Severity Index）亦即係銀屑病面積及嚴重程度指數，而後面嘅數字90就代表經過治療後，較用藥前得到90%嘅改善。而張頴康亦提到希望向PASI 100呢個目標進發，並鼓勵其他銀屑病患者，只要肯堅持就一定可以醫好。
(on.cc東網)
