無綫視帝陳展鵬被爆出是非，有指他去年在將軍澳以三萬元租金租住一個八百多呎高層單位，有所謂蒙面業主爆料指展鵬單方面提早退租兼欠交一個月租金，事後業主收樓時發現地板變黑發霉，冷氣內有釘，亦一直聯絡不到展鵬母子。
地板一早就撬起咗
展鵬接受東網獨家訪問，並提供證據逐點作出反擊，他說：「第一，其實幾個月前已經Send咗地板條片畀業主，當時已經撬起晒好危險，希望佢整番，但佢一直拖，冇搵人處理。」按常理推斷，相信沒有租客會自己撬起屋企地板。
展鵬更指母親因地板問題在家中發生意外：「有一日我媽咪喺屋企因為咁Kick親撞親個頭，要入深切治療，住咗好耐醫院，當時我要出埠工作，我媽咪處理唔到呢件事，所以先交畀助手處理，助手亦都有啲嘢透過管理處做一啲交收，絕對唔係唔見咗人，而且係我先通知業主個地板有問題，一開始住已經有少少問題，唔係我哋住到咁。」
冬天都冇熱水用
關於冷氣問題，展鵬表示冷氣已經壞了一段時間，業主曾搵師傅維修：「至於點解有粒釘？我都唔知，我唔會自己撬開佢吖嘛！」他又指單位入住不夠一年已甚多問題，熱水爐亦已壞了一段時間，母親在冬天都沒有熱水用，但業主一直沒有正視。
此外，有關拖欠租金，展鵬表示是雙方有共識的協議，而且有WhatsApp對話證明，如該所謂蒙面業主屬實，可以找律師處理。
(on.cc東網)
