前排陳展鵬因為一張宣傳相執到個樣唔同晒兼膠味濃，喺網上又俾人拎番穿衣品味同埋傳割雙眼皮、瘦面等等嘅事成為話題，事後陳展鵬出席活動，就話唔嬲當係宣傳，仲話覺得冇問題，自己真金不怕熊爐火。
點知視帝陳又有是非纏身，今日有周刊報道，話說視帝陳喺17年喺將軍澳維景灣畔用三萬蚊租咗個三房八百多呎嘅高層單位，本來一般住宅租約都係一年生約、一年死約，不過視帝陳要求業主同佢簽兩年約，最後雙方達成共識，租約直至19年4月30日先結束。
點知喺今年年初，視帝陳透過助手同業主投訴，稱因為地板撬起、令陳媽媽跌倒，事後業主話搵裝修師傅上門，但視帝陳拒絕，未幾卻由助手send咗條短片俾業主，聲稱話屋企嘅地板撬起晒好危險，加上陳母受過一次傷，反正租約已過咗一年，又知道呢個單位不愁冇租客，所以佢決定住到五月就會搬走。業主接受周刊訪問時稱，陳展鵬母子不單冇履行合約、單方面提早搬走，而且仲冇交最後一個月嘅租金。
業主對於視帝陳呢個建議拒絕接受，但一直無法聯絡上，包括視帝陳、其助手，同陳母。陳母試過成功聯絡上，但佢就將個波交俾個仔。之後視帝陳助手搵業主，話會喺4月30日交匙，不過嗰日係Send咗啲相同文字，聲稱視帝陳唔喺香港，鎖匙已交到管理處。
雖然管理處表明唔可以代收，但係視帝陳一於懶理，仲話問咗律師係可以，如果佢哋唔合作嘅話，就搵律師告佢哋。最後業主搵咗管理處同議員上門收樓，發覺屋企有地板變黑發霉，於是搵陳媽媽又冇覆，仲block埋業主嘅電話，之後業主仲發現視帝陳喺冇通知佢嘅情況下，鑽咗兩個入牆架、窗簾掛架、走廊天花仲鑽咗一個有五蚊咁大嘅窿，報道話業主為咗呢件事好嬲，仲話對方好無賴。
事後視帝陳接受周刊訪問，佢話：「我唔方便回應，所有嘢有律師跟緊，仲俾咗掛號信俾佢，佢要小心啲，我係跟足所有條例去做。」今日視帝陳會喺電視城出席活動，唔知佢又會點樣回應呢件事呢？
(蘋果日報)
