荷李活電影《侏羅紀世界：迷失國度》昨晚喺中環ifc戲院舉行首映，劉嘉玲、楊千嬅、陳奕迅、徐濠縈等人有出席。
雖然今次活動由丁子高嘅公關公司做搞手，不過丁子高日前喺ig貼咗張手臂吊鹽水嘅相片，佢留話食完早餐出咗去跑步，點知個肚好痛，原來患上急性盲腸炎，要立即入院做手術。
問到丁子高o依家嘅情況，老婆楊千嬅就話：「佢噚晚開完刀，o依家休息緊，如果傷口冇血水出，今晚就可以出院！」唔知係咪真係食完早餐就跑步就出事，千嬅話：「唔關事，佢早餐唔係食好多，醫生話盲腸炎冇原因，可能抵抗力唔好，細菌入腸。初初以為係腸胃炎絞肚痛，之前試過有一次跑跑吓下肚痛，嗰陣佢話消化不良，不過我都有叫佢睇吓醫生，嗰陣佢應該聽我講。」
千嬅仲話：「不過o依家冇事，休息吓就得，收到消息嗰陣真係嚇死，好似拍劇一樣，但係我冇嚇喊，我以前係護士嚟㗎嘛！」唔知阿仔又知唔知，佢話：「知道，佢都驚咗一吓，噚日係阿仔6歲生日，不過真係好橋，6年前同一日，喺同一間醫院我生咗仔，點知到今日佢又喺同一間醫院攞條盲腸出嚟，大家都要小心身體！」
(蘋果日報)
