昨日突然自殺身亡，被發現倒斃住所內，相信她是自殺離世，震驚各界！
55歲美國女設計師Kate Spade 自殺身亡的消息震驚時裝界。
香港著名形象指導郭慶彬（Ricky）表接受傳媒訪問時表示：「睇到呢個新聞好唔開心，覺得好可惜，事件震撼時裝界。佢設計理念好成功，好受歡迎。佢設計好女性化，用啲顏色、花花圖案令顧客感到好開心。印象最深佢設計過一個小提琴造型嘅手袋，吸引到男、女顧客目光。網上有指佢有抑鬱症，所以大家真係要正視呢個病。」
名模琦琦：「佢創立呢個品牌，雖然股份都賣畀人，但係佢依然係品牌嘅靈魂，好可惜，唔知佢乜嘢原因，覺得無論有乜嘢病，都會好勇敢去生存落去，可能佢有說不出嘅苦衷，去了結自己人生，佢仲有個13歲嘅女。有乜嘢解決唔到，自己去咗個女點算？得13歲，做父母應該要為小朋友諗吓。」
香港名模陳嘉容說：「好傷感，我睇咗報道，我好驚訝！當然好唔開心，因為我真係好鍾意佢啲嘢，佢啲手袋、衫及首飾係好得意，同其他品牌唔同，完全別樹一幟，好傷心。（你見過佢本人？）佢嚟過香港一次開舖，所以見過一次，佢好正，爽快，好親切，一個咁有天分嘅人，突然間咁樣，希望佢上天堂安息。」
另一名模歐陽妙芝說：「我好耐冇用呢個品牌，我覺得好似生活逼人，每日都好似有啲唔好消息聽到，或者係一個解脫，希望佢安息，好可惜！（55歲好年輕？）好似愈來愈多年輕人用呢個決定去輕生，真係有啲可惜。」
潮媽陳慧琳（Kelly）曾穿戴此品牌，對此她透過電話表示：「我今年年頭做咗Kate Spade嘅活動，我聽到呢個消息都覺得好突然、震驚，我本身好欣賞Kate Spade嘅設計，因為令人好開心、顏色又好繽紛、設計好得意、好有諗頭，所以我都好喜愛呢個牌子，聽到呢件事好震驚、冇諗過，對佢嘅逝世覺得好可惜。」
(on.cc)
