洪欣大仔張鎬濂(Ashley)眨吓眼已經17歲，兼中學畢業喇！洪欣同老公張丹峰今日喺微博貼出一家三口合照，着住畢業學袍嘅Ashley真係快高長大，已經高過父母，媽咪洪欣留言：「接下來還有更重要的，張鎬濂，我們一起努力。」
而張丹峰亦貼相留言：「未曾錯過哥哥每一個重要的時刻，中學畢業啦！從幼兒園，小學到中學怎樣覺得一眨眼就過了，時間去哪?還好我們都沒老。」
洪欣今日電話回覆《蘋果》，講到囝囝中學畢業，笑言唔敢相信，日子過得咁快：「好似冇幾耐咁，佢入中一時，我仲係好擔心，因為嗰時細個，學校離屋企都幾遠。咁快就畢業，當然好開心，但做媽媽嘅，個仔幾多歲，一路都會有唔同階段嘅牽掛，其實讀書係最簡單嘅階段，出到社會就係從新開始，嗰時嘅擔心會多過讀書時，因為出到社會面對嘅問題更加多，不過囝囝好乖，好聽話，希望佢將來嘅人生，可以順順利利。」
至於Ashley將來升學嘅選擇，洪欣話無論囝囝選咩，作為媽媽都會支持，等7月考試放榜，再作打算：「最重要佢開心，由細到大，唯一希望佢成長過程，將來到老都可以快樂，唔使為其他事擔憂。男仔對事業比較看重，我成日同個仔講，任何事都唔使太緊張，只要盡咗力，就算達唔到理想都唔緊要，最重要問心無愧，快樂同健康。」洪欣仲笑話由細到大幫囝囝儲埋嘅利是錢，會等到佢8月16日18歲生日時，一次到畀番晒佢，唔知呢份算唔算係畢業禮物喎。
(蘋果日報)
