現年37歲鍾欣潼（阿嬌）要升呢人妻啦，佢今年初跟台灣「醫界王陽明」之稱嘅賴弘國訂婚，兩人將於香港時間26號凌晨喺洛杉磯（LA）舉行婚禮，並選定喺當地一間近百年歷史嘅五星級酒店Millennium Biltmore Hotel Los Angeles舉行。
一對新人親自訂出嘉賓名單，阿嬌經理人霍汶希（Mani）日前已飛抵LA打點，蔡卓妍（阿Sa）、鄭希怡（Yumiko）則做姊妹，Yumiko囡囡梁浸浸則安排做花女。據知，喜帖上列明，賓客可於香港時間周六（26日）凌晨3時許到場，有指呢個係pre wedding，所以一對新人前一晚唔會有傳統上頭儀式，婚禮當日亦都冇註冊同行禮，所有儀式會留待年底返香港先舉行。
阿嬌剛完成婚前美加巡唱，所以爭取時間休息，務求明天以最佳狀態示人，阿嬌同未婚夫賴弘國今日約同雙方家人出外晚膳，然後就提早返酒店休息。酒店已安排好明天派對會場布置，依照一對新人心意，布置成鮮花陣，並以紫色鮮花為主，增添浪漫氣氛，問到阿嬌待嫁心情，Mani今日覆《蘋果》：「其實大家都好放鬆，唔緊張，聽日係一個party，大家都戥我哋個嬌嬌好開心，希望佢永遠幸福。」
(蘋果日報)
