藝人被「消失」…有機會唔關自身事，有時可能無啦啦被牽連，藝人係好被動，好似無綫同蕭定一公司最近有官司糾紛，張繼聰早前無辜捲入「糾紛」，即使喺大台上緊位，仍瞬間被「消失」，佢承認自己會短暫喺公仔箱「消失」，原來受影響嘅……唔止張繼聰，仲有娜姐周秀娜。
佢早前拍完大台劇《宮心計2深宮計》，上年如常出席宣傳活動，點知最新嗰條宣傳片中，唔見咗演鄭皇后嘅周秀娜，一眾演員昨日喺將軍澳出席宣傳活動，亦獨欠周秀娜嘅蹤影，連佈景板都冇娜姐張相，相信同無綫與蕭定一公司嘅官司糾紛有關。
總監梅小青被問到呢件事，佢就話留俾公司去講，當然有啲影響，不過劇中就冇cut走娜姐嘅戲份，大家都合作得開心，對於周秀娜明顯「被消失」，佢經理人GME公司回應：「演員會做好自己嘅演出工作，其他嘅嘢有啲唔到我哋控制。如果有關Chrissie喺呢套劇嘅宣傳，大家可以搵番我哋嘅宣傳部同事。」今次仲係娜姐首次幫大台拍劇，點知搞成咁!?
(蘋果日報)
