成日都有人問：「如果人生只係淨番30分鐘，會選擇同邊個一齊過？」呢一條問題真係話易唔易，話難唔難！但如果變成問「最唔想同邊個一齊過」，唔知大家又會唔會覺得難答呢？無綫官方Facebook專頁「See See TVB」就搵咗有份拍攝電視劇《棟仁的時光》嘅一眾演員去回答呢個相當複雜嘅問題！
喺劇中唐詩詠、朱晨麗及郭子豪等人，同飾演靠借其他人時間生存嘅袁偉豪（Ben）經常都會有對手戲，而私底下佢哋亦都相當老友，又點會估到佢哋竟然不約而同咁話「最唔想同袁偉豪度過人生最後嘅30分鐘」。不過並唔係因為佢哋面和心不和，只係佢哋都覺得拍戲嘅時候已經成日都要對住Ben，而且喺劇入面仲要經常畀佢錫錫，所以大家都話唔想連人生最後嘅30分鐘都要對住佢啫！
如果人生得番最後嘅30分鐘，袁偉豪會同邊個過？
張寶兒聽完係咪會冧冧豬呢？（資料圖片）
梗係揀女友張寶兒啦！
不過大家又有冇諗過，其實佢哋嫌棄Ben嘅同時，Ben都會嫌棄佢哋呢？Ben就話如果人生只係得番30分鐘，佢會叫歌手周柏豪畀晒啲錢佢，然後將啲錢開套戲畀老友黃智雯，等佢可以提早退休唔使做咁話喎！不過咁重要嘅時間，又點會少咗Ben嘅女友張寶兒呢？所以Ben就話票房嘅收益會用嚟同佢心愛嘅女友過埋最後啲時間。講到呢到，Ben自己都忍唔住笑咗出嚟，唔知張寶兒聽到之後係咪都會冧冧豬呢？唔少網民都話Ben呢招隔空冧女冇得輸，不過亦都有人笑言：「你想同張寶兒過啫！你又有冇問過佢想唔想同你一齊過先？」
袁偉豪真係好識氹女朋友～
網民有話兒：
Gouxxx_Pxx：個個都唔要袁偉豪，笑死咗！
Waxxxs Kim：睇見佢哋，我就諗起一句歌詞「莫道你在選擇人 人亦能選擇你」
Tokxx__0886：唔緊要啦！Ben有張寶兒嘛～
HaHxx Chxxx：好閃囉，可唔可以唔好諗呢？
(on.cc)
