李亞男今日去玫瑰崗學校出席活動宣揚護眼訊息，身為護眼大使，佢好注重小朋友嘅健康同愛錫佢哋，問佢幾時有生BB嘅好消息？亞男話：「我都好想知，見到朋友同助手個個都有，我都心痕。」之前亞男被影到去醫院探助手嘅初生BB，佢開心咁講：「係助理朋友嘅BB，我知佢都想要，亦好努力，生咗個咁可愛嘅BB都戥佢開心，我都去探咗佢幾次。」
問到有冇叫老公王祖藍畀多啲時間造人？亞男笑言：「佢好好，留喺香港都冇乜搵朋友，得閒就搵我。」亞男解釋係冇乜搵朋友飲杯嘢，喺生B嘅問題上，唔想俾大家太大壓力，亞男仲爆之前有朋友送咗啲壯陽食品瑪卡畀佢哋，當時佢唔知係乜嚟收埋咗，亞男話：「o依家要搵返出嚟。」
提到好姊妹鍾嘉欣懷第二胎，亞男好替對方開心，仲話：「佢好勁！佢都有教我做返自己，注重飲食健康，我都有煲湯同老公一齊飲，做番平時咁，輕鬆心情，食啲supplement就得。」
(蘋果日報)
