懷有第二胎嘅藝人葉翠翠對囝囝周津羲（小王子）向來都寵愛有嘉，所以佢都幾乎24小時都會陪住小王子。不過就算幾謹慎都好，同樣都會有意外發生。
今日翠翠就喺社交網發文，指尋晚直播時小王子突然爆喊，之後仲發現佢塊面仔紅晒，而佢嘅外傭就話因為小王子爬得太快，所以跌咗落地！事後翠翠睇番閉路電視影片，竟然發現外傭講大話，當時傭人喺度睇手機，小王子就周圍爬唔理會，小王子最終站起來然後跌落枱腳撞到面仔。翠翠話外傭平時喺佢面前會同小王子一齊唱歌，點知「原來顧主一唔睇住都係一樣。」唔少網民睇見小王子塊面仔紅晒都紛紛話好心痛，仲叫翠翠要加雙倍小心！
之後翠翠亦有甫出囝囝瞓緊覺嘅相，並透露小王子面上嘅紅痕變咗瘀痕，翠翠留言：「本來安排好下午一連串活動，又係取消晒……小王子面上的紅痕已經退了，但見到紫紫地的痕（瘀咗），雖然唔好深紫，但可以肯定知道當時一定是好大力撞……工人又唔可以鬧，大聲啲都唔得，佢要整蠱你實在太容易了……現在真的只能自己睇實！」
(on.cc東網)
