李亞男早前被老公王祖藍爆有抑鬱，情緒不穩，曾兩度入院。近年祖藍已減少返大陸工作，多啲時間陪老婆，以免獨守空房，更揚言要想快啲生BB。
日前《蘋果》讀者葉太透過《爆相爆片》，表示4月中喺仁安醫院見到李亞男喺候產室門外，原來佢有一位女性朋友啱啱生完BB，所以前往探望。當日傍晚6點半，李亞男穿上一條超短牛仔褲襯西仔褸，大騷43吋長腿，葉太話：「我諗其中一位係BB嘅媽咪，仲有幾位朋友，但因為前排只能放3位BB，已經滿咗，佢哋要等多15分鐘。」
等候其間，葉太話李亞男同剛生完BB嘅媽咪不停玩自拍，葉太話：「佢哋見到BB之後就好興奮，不停講話BB似邊個，李亞男仲話『好得意』。」
李亞男接受《蘋果》電話訪問時，表示去醫院探同事，佢話：「同事有咗嗰一刻，已經戥佢好開心，所以BB出世就即刻去探吓佢，沾吓喜氣。(自己想唔想快啲生小朋友？)見到BB都好希望自己都有，所以好努力好努力，希望今年有好消息同大家分享嘅。」
(蘋果日報)
