前港姐張寶兒（Bowie）同袁偉豪打得火熱，仲不時放閃，但其實Bowie未同袁偉豪拍拖之前，曾經同一個叫Jonathan嘅男仔拍拖多年，但Bowie入行冇耐，佢哋就分咗手，而Bowie亦都未有講解兩人分手原因！
呢日，Bowie錄影好姊妹麥明詩主持嘅節目《#後生仔傾吓偈》，罕有地講番上一段感情嘅死因！呢集以「分手」為主題，雖然佢冇開名講個男仔係邊個，不過就話係入行之後就同呢個男朋友分手，啲時間咁脗合，似乎真係講緊Jonathan啵！Bowie笑笑口咁講番當日分手嘅經過，佢話因為入行後工作愈來愈忙，同對方感情生變，她說：「入咗行之後，我個mindset（心態）就係『有嘢忙有嘢忙』，佢就開始Feel到我offline咗。」
Bowie話對方知道大家距離愈來愈遠，但就冇輕易咁放棄呢段感情，反而好努力箍煲，她說：「佢開始送花畀我，咁多年都冇送過花畀我，但終於送花畀我喇，又送嘢畀我，又陪我去邊。」
聽到在場人士都嘩嘩聲，但就換來Bowie嘅一句：「我已經冇感覺喇！」唔少網友都話佢前度男友已經補救得太遲，仲話Bowie變起心上嚟認真夠狠，但亦有網友力撐佢其實只係理智啫！但講到尾，如果Bowie唔分手，又點會畀佢遇到袁偉豪呢？
網民有話兒：
Viexxxe Yxxn Wxxg Yxx：冇錯，冇感覺就做咩都冇用
Stexxxn Pxxg：唔緊要，好多人等住追你
xx水：係個男仔唔識貨！
Yxxn Kxxa：如果唔係你都遇唔到袁偉豪啦！
(on.cc東網)
