兩奪視后寶座的藝人胡定欣接受電台節目主持人梁泰來訪問，定欣入行以來曾先後公開與吳浩康及馬國明的戀情，但最終都因不適合而無疾而終。而近年定欣只與螢幕情侶陳展鵬傳過緋聞，但雙方均否認戀情，不少人都開始替她的感情狀況緊張。
定欣大方剖白感情事！
定欣到了適婚年齡，坦言母親希望自己能在事業及感情間取得平衡：「媽咪以前都冇問我感情事，但近一、兩年趁去旅行嘅時候都會問一問，我就同佢講話『媽咪，Timing呢啲嘢，緣分未到就真係未出現，急都急唔嚟。』其實佢嘅出發點都係擔心我，三十幾歲，是係時候搵個適合自己嘅人去建立家庭，有個人去照顧我。佢知我好用心工作，但亦覺得我需要去諗一諗（感情方面）。而且呢幾年真係愈嚟愈忙，亦都未有咁嘅緣分出現。」
定欣自爆會對有才華的人加分：「朋友經常話我『愛才』，對方總要有啲特質係我好欣賞、會想去學習嘅、好佩服、好仰慕嘅，呢啲會特別加分，亦都要係一個心地好嘅人，係人都鍾意好男仔！我冇話一定要係圈內定圈外，最緊要係適唔適合。」
對於現時與馬國明及陳展鵬的關係，定欣亦大方剖析：「我同馬國明係有承認過一齊，係好耐之前嘅事，依家我哋都係好好嘅朋友，最後都唔能夠一齊就證明我哋唔適合。有時都要分清楚鍾意同適合，鍾意唔等於一定要喺埋一齊。至於陳展鵬，佢絕對係一個好好嘅拍檔，最近兩次合作都可以感受到觀眾好鍾意我哋兩個。我好欣賞佢，佢係好鍾意演戲，所以拍劇過程中都分享咗好多關於演戲及工作上嘅經歷。」
馬國明
陳展鵬
(on.cc)
