余文樂去年同台灣模特兒王棠云結婚，之後不時傳出樂嫂懷孕嘅消息，但當事人一直都好低調，未有否認又唔承認，直至上月底，余文樂喺北京出席電視劇《冒險王衛斯理》嘅記者會時，先認快做老竇，老婆預產期於6月。
雖然老公都已經認咗將榮升做爸爸，但樂嫂都好低調，即使喺社交網貼全身相，都會巧妙咁用掩眼法遮孕肚，但佢噚晚就喺ig度罕有地上載咗一條限時動，見佢同朋友好開心玩自拍，樂嫂仲嘟晒嘴咁扮萌，大騷勝利手勢。
呢段限時動態，可清晣咁見到樂嫂個孕肚，但係佢嘅手腳依然纖細，完全睇唔出佢係一位準媽媽囉。有網民就留言話：「懷寶寶也沒一點多餘的肉」、「身材也保持太好了」。除咗同朋友拍限時動態，樂嫂亦喺ig貼圖，呼籲大家捐出二手衣物，幫助有需要嘅人。
(蘋果日報)
