「滄海一聲笑，滔滔兩岸潮，浮沉隨浪只記今朝」，這幾句歌詞基本上已是港人的集體回憶，哼返幾句肯定無難度。這首正是一代才子黃霑為電影《笑傲江湖》寫成的主題曲，近日有網民分享了霑叔當年的訪問片段，提到創作這首歌的過程，而且不說不知，主唱之一的許冠傑曾想改動霑叔作品，霑叔當時「企硬」堅持無得改「唱就唱，不唱就拉倒」，霑叔之後還透露歌神「先食飯後錄音」的習慣。
電影《笑傲江湖》主題曲《滄海一聲笑》，由許冠傑、黃霑及張偉文合唱。（網上圖片）
面對歌神許冠傑，霑叔一樣無面畀，呢啲咪叫創作自由囉。（網上截圖）
神曲《滄海一聲笑》榮獲第10屆香港電影金像獎「最佳電影歌曲」，紅遍中港台，除了由許冠傑、黃霑及張偉文合唱的粵語版，亦有黃霑、羅大佑及徐克合唱的國語版本。霑叔在訪問中表示「隻歌好奇怪，好多時音樂插曲係跟住套戲，個戲得呢，隻歌就跟住出嚟。」談到創作經過，霑叔表示：「兩大高手加上令狐冲，佢哋會彈咩歌呢？一係彈難到除咗佢哋之外，全世界無人識彈嘅歌，一係就彈「Twinkle Twinkle Little Star」，最簡單嘅歌彈到最好嘅，究竟寫最難好定最易好呢？」
霑叔在訪問中講到創作《滄海一聲笑》的過程，而且Sam曾經提出要改動歌詞。（網上截圖）
霑叔話要改歌詞，不如唔好唱。（網上截圖）
之後徐克一錘定音用《滄海一聲笑》作為電影主題曲，之後霑叔卻又遇上另一難關，「入到錄音室，sam哥要改呀，我話sam，滄海一聲笑我點都唔肯改，話之你係歌神定歌天主，我都唔畀你改，唱就唱，唔唱就拉倒。」不問可知，許冠傑尊重霑叔，並相約到寶麗金的錄音室錄歌，又令霑叔大開眼界。「歌神即係歌神，另類嘅，唔係人嚟，我哋啲孤寒監製，梗係錄好就走，但佢唔係，7點去到錄音，Sam去到問我想食乜嘢呀？咁咪同佢食飯，四菜一湯，左傾右傾，去到8點幾先唱，又好嘢喎，佢用最relax方法去唱，我學到嘢呀嗰次，之後我都係慢條斯理，大家好輕鬆入去唱，效果仲好。」這首《滄海一聲笑》在電影中出現了5次，觀眾散場時已經識得唱，堪稱洗腦神曲始祖。
