豆斗邱淑貞同老公沈嘉偉一齊出席傑出領幅選舉，喺剛過去嘅農曆新年舉家大陣仗出埠旅行，豆斗笑言：「不嬲出門都好大陣仗。」
問豆斗屋企邊個係領幅？佢話：「當然係爹哋啦，啲女聽晒佢話，不過幾個女都好乖。」驚爹哋定媽咪多啲？豆斗笑：「兩個都唔驚。我哋驚佢哋多啲。佢哋唔係反叛，真係好乖嘅。」承繼爹哋生意？豆斗就話未知。
豆斗15歲嘅大女沈月越大越靚，仲被捧做「最索星二代」，感情生活同社交網動向亦備受關注，仲有報道話沈月有拖拍之後，已經好少陪「兩老」——即沈嘉偉兩公婆出外享受家庭樂。豆斗可能唔想大女受影響，所以訪問中三句不離女兒，甚至主動謂：「講番我大女啦，其實佢真係冇諗過入娛樂圈，佢自己都唔想入，希望大家唔好跟佢喇。佢有時都唔開心，返學又俾人跟住，同爹哋食嘢又俾人影晒，希望大家俾多啲私人空間佢啦。」又謂因為咁樣，大女就連ig同微博都停止更新。
（資料圖片）
問到其實大女係咪本來想入行，但俾報道嚇怕咗？豆斗稱：「其實一路都冇話嘅。可能我喺佢由細到大都有講番（入行經歷），可能佢都唔想受咁多壓力。我都有同佢講如果想做model都可以嘅，但佢都話唔想囉。」又謂其實都有好幾間公司分別搵佢兩母女，希望可以簽沈月，不過沈月似乎真係無意入行。
沈月同媽咪邱淑貞一模一樣樣。（ig圖片）
(Apple Daily)
