商台DJ少爺占（甄子康）同老婆冼燕珍係幼稚園同學，兩人喺中學時重遇拍拖，愛情長跑咗足足17年，06年秘婚，瞞婚7年後才公開人夫身份，囝囝甄和天（Timmy）快滿4歲。日前阿占夫婦陪囝囝遊香港公園，一家三口選擇親子樂嘅形式，並唔係行街購物食飯，而係帶囝囝親親大自然認識小動物，被讀者張小姐透過「爆相爆片」分享溫馨。
少爺占日前帶同妻兒去公園（讀者提供圖片）
張小姐接受電話訪問表示，當日下晝約2點幾，喺香港公園見到阿占一家三口：「佢哋圍住一齊睇松鼠，阿占仲指住畀囝囝睇：『有隻松鼠喎！』小朋友見到好開心，雖然唔可以掂松鼠，佢老婆就幫小朋友影相，阿占一直企喺老婆後面。」問到阿占囝囝係咪活潑好動？張小姐話：「佢囝囝都好乖，冇走嚟走去，好聽媽咪話，個樣都好似媽咪。」由於阿占都好低調，張小姐話冇乜途人認到佢：「佢哋大約企喺度睇咗十幾分鐘，阿占見到我哋望住佢，表現cool cool哋冇乜表情，但都冇即刻拉囝囝走，一家三口表現好平民，睇得出佢哋好開心。」
張小姐指佢哋一家睇松鼠（讀者提供圖片）
今年情人節係阿占兩公婆結婚12周年紀念，阿占更喺社交網用《Old school love》歌詞向老婆示愛：「情節我寫進日記慢慢回味 舊記憶每頁每頁都滿是你 頭髮白色和老人斑都完美 而我倆情懷活在舊日世紀」《蘋果》致電問阿占帶囝囝去親親大自然，係咪好過行街購物食飯？阿占喺電話表示：「係呀，因為學校鼓勵放咁長假期，應該去吓唔同地方，所以我哋去咗香港公園睇吓植物，同埋呢個係bonus，因為松鼠基本上係移民咗去香港公園，冇端端喺樹上見到松鼠，我諗佢唔係屬於嗰個地方。」
仲話阿占囝囝Timmy好乖（讀者提供圖片）
阿占話趁囝囝放假，所以去遊公園。（讀者提供圖片）
(蘋果日報)
