楊冪同劉愷威結婚3年幾，近年屢傳兩公婆聚少離多，屢傳婚變，不過楊冪同劉愷威均否認傳聞，去年楊冪工作室指下半年時間，楊冪會將更多嘅時間用喺劇組拍戲同陪伴家人上，之前老爺劉丹都講過新抱農曆新年嚟香港一齊過節，點知今日有報道指，年初二當日只係見劉愷威載父母及囡囡小糯米，去深灣食開年飯，不過老婆楊冪則未有同行。
剛才劉愷威喺微博貼文回覆屋企過年嘅事，希望大家唔好以訛傳訛，「希望報道的話還是把我們的回覆說完整，此前我也回答過『會回來』、『回來了』，而當時情況不方便多做停留才沒顧慮太多。」
劉愷威又指爸爸劉丹之後再回答傳媒都係如實告知「回來了，我們一起去會所度了假」，劉愷威認為過年係家事，大家都高高興興。言下之意係楊冪有來港一齊喺會所過節。其工作室微博亦寫道「過年是家事，請給予應有的隱私空間，請不要以訛傳訛！」
(蘋果日報)
