藝人陳敏之到尖沙咀出席「big big明星市集」，她說：「通常星期日我都會陪我個仔嘅，但係今日做善事好有意義，我都係第一次喺呢個戶外場地擺檔，我冇帶個仔出嚟，因為依家流感，唔會去人多嘅地方，佢連學都冇返，我自己出街都袋住消毒藥水同洗手液，我要保護自己，唔可以病，唔可以將細菌傳畀屋企人！」
敏之被問到對近日城中就流感疫苗成效議論紛紛，她表示：「我本來都想打疫苗，但咁啱患咗感冒唔打得，依家好番！我個仔冇打疫苗，因為我老公有男人自己嘅一套想法，認為注重衞生就得喇，唔想個仔接觸咁多藥，唔係話認為疫苗冇效，我本來都約咗醫生，想偷偷帶個仔去打，但怕有乜事，老公一定鬧！（網上眾說紛紜有冇影響你？）冇，打唔打應該靠自己分析，每個小朋友體質唔同，要因應環境，所以兩邊都各有支持者，我會尊重老公，大家嘅大前提都係想身體好啫！」
(on.cc東網)
