吳佩慈為百億男友紀曉波目前生咗兩男一女，不過未有「封肚」，早前疑似喺大陸一個網上平台分享扮靚心得，介紹護理懷孕肚皮嘅產品，原來吳佩慈仲想追多一個。
佢自知生完三個B之後，要一直堅持用護理產品養好肚皮，「連續生了3個小孩子，肚皮怎麼都不比從前，畢竟4年連續吹脹3次還是破壞度不小的」，之但係吳佩慈仲未生夠，喺文中預告ready生第四胎，「我得把它養好了應付生老四啊」，佢直言人生已經進入「肚皮比臉皮重要」嘅階段。
有網民好奇問：「已經懷第四胎了嗎？」吳佩慈回應：「沒有，尚未休息夠。」亦有網民疑問為甚麼咁愛生小朋友，吳佩慈就話：「我愛，我喜歡大家庭的感覺。」
另一網民話冇諗過一直貪靚嘅吳佩慈又想再生B，話生B好辛苦，問吳佩慈生三個唔夠嗎?吳佩慈寫道：「哈哈，我媽也一直這麼說。」
不過呢個大陸平台中，呢個吳佩慈用戶雖然有「官方認證」不過係咪真係佢本人真係有待確認。
吳佩慈未婚夫紀曉波、準婆婆崔麗杰喺塞班島投資興建酒店、度假村與賭場等，吳佩慈為紀家繼後香燈，紀家送禮從不手軟，無論係紀曉波當初送價值696萬港元嘅10卡鑽戒、約110萬港元卡地亞美洲豹腕錶、市值4120萬港元豪宅，ANNA HU貴芙蓉公主版與皇后版母女戒等，去年生完細仔Hudson，「婆婆」崔麗杰更送價約2600萬港元嘅10.4克拉巨鑽，可見吳佩慈喺紀家嘅地位幾重要。
(蘋果日報)
