近日受老公洪天明背妻偷食疑雲影響嘅周家蔚，繼日前如期出席好友陳敏之囝囝「雷冬至」生日會後，噚日又再出動，出席另一個生日P——就係佢另一好姊妹姚樂怡囡囡「小雞髀」Gaibe嘅2歲生日會。
姚樂怡今日喺社交網站貼咗好多相，雖然個規模冇敏之嗰個咁大，但係參加人數都唔少，仲見到湯盈盈、鍾麗淇、蔡一智夫婦等圈中好友，帶同自己嘅小朋友現身。
見到壽星女Gaibe着住條紅色裙仔，非常趣緻得意，除咗同其他小朋友仔玩，仲有坐喺大玩具車上「揸車」，又有玩吓樂器咁，當然唔少得小朋友最愛嘅波波池。
姚樂怡送上卡通兔仔嘅生日蛋糕俾囡囡，再好簡單咁留言話：「小雞髀的生日派對好開心！」
至於Gaibe個靚契媽佘詩曼，因身在哈爾濱而缺席生日會，佢今日有轉發姚樂怡個微博，仲留言稱：「契女！契媽爭你一封大利是，生日快樂！快高長大！」
（蘋果日報）
