藝人苟芸慧（苟姑娘）與男友陸漢洋出席歌手關心妍有份搞嘅慈善晚宴，陸漢洋話今次除咗買枱支持關心妍之外，亦有份支持關心妍老公楊長智，因為彼此係好朋友。講到關心妍話老公今次有份做咕哩，問到陸漢洋會唔會做埋？他說：「我未得閒，如果有需要我都會做嘅。」
問到陸漢洋有冇接觸過抑鬱症嘅朋友？聽完佢就望住苟姑娘（苟姑娘早年曾患有抑鬱症）話：「其實每個人都有心情好同唔好嘅時候，我自己都有試過情緒低落，最緊要係嗰刻有朋友支持。（賽車畀到好大壓力你？）都係嘅，自己又新建立車隊，比賽前都有好大壓力。（依家有女朋友係咪好好多？）好好多，之前就有抑鬱，依家就有益而冇鬱，係益處個益。（你兩個一齊咗開心好多？）佢直情係我嘅仙丹、天山雪蓮。」
另外，問到苟姑娘當時有抑鬱係咪好影響心情？她說：「係呀，嗰吓好需要人幫手同關心，先唔會令到自己咁差。（男友係咪你嘅仙藥？）佢教識我點樣去宣洩情緒，我就同佢相反，賽車反而令我可以宣洩到情緒。」當問到苟姑娘會唔會搵男友發洩？佢就好甜咁望住男友話：「我邊夠膽喎！」陸漢洋聽完又即刻話：「唔好咁講，一個人唔開心嘅話，真係要適當搵嘢去發洩，例如聽音樂、賽車、跑步同埋做運動等等。」
(on.cc東網)
