52歲郭富城(Aaron)推出有份投資嘅AKFS plus自家護髮品牌，今日喺金鐘舉行發佈會，城城做老闆，心情大靚，除咗做生招牌拍廣告，佢仲對產品好有研究，喺發佈會上同大家分享，城城話：「嘗試從商係人生另一階段，希望用自己嘅經驗推廣品牌，好嘅開始係成功嘅一半。我平時拍戲、演唱會時漂頭髮，都會好傷頭髮，所以護理好重要。」
榮升咗做爸爸嘅城城，今次又做埋老闆，佢笑言囡囡Chant腳頭好，城城仲諗定將品牌搞得成功，日後交捧畀愛女，問到最近囡囡容貌曝光，仲被讚雙眼好大，城城好開心咁話：「係呀，好大隻眼，好得意，3個幾月，o依家識講媽，不過唔係太純正嘅，大家都覺得奇怪，係好開心嘅一件事，自己專注工作，o依家有屬於自己嘅品牌，成功咗就交畀囡囡，爸爸嘅身份要做得更好。」而城城仲話等囡囡大啲就同大家分享囡囡嘅相片，講番今次品牌，除咗家人，連朋友都有受惠，問佢有冇諗過出BB系列？城城話：「好提議，BB用嘅同大人唔同，要研究。」講到聖誕節，城城就話啱啱拍完電影，有幾日假期，可以同家人聚天倫，之後就要為喺上海嘅新年騷做排練。
城城一講起囡囡Chant就笑不攏嘴。
城城創辦護髮品牌。
今日舉行發佈會。
城城亦大讚囡囡雙眼好大。(資料圖片)
(Apple Daily)
