千億新抱徐子淇 (Cathy)早前就帶咗三名子女，跟隨救助兒童會到老撾探訪，藉此希望大眾更加關注在東南亞最被邊緣化的兒童之苦況。Cathy話：「今次到訪老撾，對我同我啲仔女來講係一次充滿意義嘅經歷。我哋有機會親眼目睹救助兒童會喺當地嘅工作情況同成果，了解到我哋各個項目可以點樣幫助生活喺老撾最被邊緣化同最窮困嘅兒童，等佢哋得到保護、教育以及醫療服務。」
今次Cathy就帶埋三個仔女同行，包括10歲嘅大女Leanna、8歲嘅二女Hayley及同6歲嘅三仔Triston，對於三個小朋友而言，有一個好深刻嘅印象，就係老撾小朋友嘅熱情款待，覺得佢哋性格樂天，以及有無限嘅創意。其間佢哋去咗一間位於Namkha地區嘅小學探訪時，見到佢哋冇錢買玩具，就利用水樽、樽蓋同小汽球自製成玩具車。佢哋仲舉行咗一個模擬賽車比賽，為今次旅程帶來好多歡笑。
Leanna說：「這次老撾之旅對我來說十分重要，我希望將來能夠幫助這些小朋友。他們在學校作了很多準備來歡迎我們。我睇住佢哋因設施不足，要自製一些臨時水龍頭洗手，唔似我哋咁方便，所以我學會了更加珍惜。」Leanna、Hayley和Triston與小朋友一起玩耍，一起畫畫。Hayley說︰「學校只有三位老師，所有年紀嘅小朋友都會一齊上課，冇分班級。雖然我哋唔識佢哋啲語言，但同佢哋一齊睇圖畫，我哋都好高興。」這真正是突破語言隔閡的文化交流。
Cathy話：「望住當地嘅小學生同我自己嘅小朋友一齊玩同畫畫，我感動到差啲喊。同香港同齡嘅小朋友相比，老撾嘅小朋友身型明顯細小得多。佢哋顯然沒有得到充足嘅營養、教育和醫療服務。據了解，一啲小女孩，有啲甚至只得十歲，喺未得到佢哋嘅同意下，被迫停學結婚，呢啲都係難以令人理解嘅。救助兒童會致力打破不良嘅傳統做法，令我引以為傲。對於女孩子嚟講，我哋會重點增加佢哋嘅社會資本、等佢哋接受教育，喺朋輩間建立起安全網；至於男孩子同男士，我哋就會積極解決性別方面約定俗成嘅規範。」
此外，Cathy亦探訪探訪咗位於Nambak地區嘅轉介醫院。佢話：「探訪醫院時我感觸良多，我親眼目睹兩名嬰兒出生，亦看到一名孕婦喺懷孕晚期流產嘅悲劇，令人心痛。救助兒童會與社區和鄉村嘅領導合作，教育年輕母親在懷孕期間如何照顧自己，以及在醫院分娩嘅重要性。老撾好多婦女都嘗試自行喺屋企分娩，而造成意外。我哋嘅工作相當重要。」
(蘋果日報)
