黃玉郎前妻倪詩蓓、鄺美雲(Cally)同沈慧林等，噚晚喺九龍灣出席「努力有明天」頒獎典禮。
喺新加坡住咗10幾年嘅倪詩蓓，最近為咗17歲嘅自閉症兒子Royce返咗嚟香港定居，獨力照顧個仔，佢話曾經處處碰釘，經歷好唔容易，詩蓓話：「個仔入咗特殊兒童寄宿學校，每日都會煮嘢食同去湊佢，為咗自己個仔，都辛苦㗎，好艱難，唔易行到呢一步，心理上好大傷害，唔睇身體上嘅傷，因為佢好多時會發脾氣，啱啱又送咗份聖誕禮物畀我(左手貼上膠布)，身體受咗好多傷，啲朋友話我屋企膠布多過乜。
」
詩蓓仲話最深刻係兩年前自己喺屋企跌親起唔到身，要爬去打電話叫救護車，個仔冇人照顧，同時送咗去兒童醫院，因為腳傷要用10個月拐杖。
嚟緊詩蓓會出書分享照顧自閉兒子嘅經驗同分享秘訣。詩蓓曾經同哥哥張國榮拍拖，被問到哥哥胞姊張綠萍日前病逝，詩蓓話：「我時間比較緊湊，冇時間睇新聞，我o依家年紀大，係師奶。決定去新加坡時，已經冇同香港嘅朋友聯絡，自己生活，尤其照顧自閉症嘅仔，佢少咗荷爾蒙，凌晨3、4點先會眼瞓，我13年嚟每日都只係瞓3、4個鐘，已經習慣咗。」
詩蓓話唔會出席張綠萍嘅喪禮，而同前夫亦都已經冇聯絡，現時將全部時間放晒喺個仔身上。
(蘋果日報)
