古天樂戴黑超現身圓方活動，公關緊張叫記者盡量唔好用閃光燈影相，之後古仔拉低太陽眼鏡畀記者睇，見到佢隻右眼爆微絲血管紅晒，古仔話：「前日喺象山拍電影《真三角無雙》，一個動作被兵器打到隻眼，自己即時返香港，醫生診斷之後，話眼球披口，穿咗個窿，縫咗8針，好在視網膜冇事，所以視力暫時ok，但都要等拆線要知。」
古仔話o依家要等十日之後先拆線，但好番都要等三、四個禮拜，問到會唔會停工休息？古仔竟然話：「盡量可以唔停就唔停，當地戲份已經拍晒，要轉其他地點再拍。」問到點解唔搵紗布遮住傷口？唔擔心受感染？佢表示：「做嘢冇辦法，坐飛機返嚟都驚氣壓㗎。」問到係咪好痛？古仔話：「梗係啦，眼珠嚟嘅喎，眨眼都痛，電影公司買咗保險。」此外，日前古仔被影到用摺機電話被笑娘，佢直認：「係呀，一個習慣嚟，其中一部手機，自己都有智能電話check吓email、上吓網。」記者好奇摺機電話仲未壞？古仔表示：「有壞過，其實自己有幾部，有時啲懷舊嘢係美好回憶。」
(蘋果日報)
