藝人唐詩詠現身機場，剛參加完新加坡舉行的《星和無綫電視大獎2017》頒獎禮的她，在頒獎禮中勇奪角色獎及最佳螢幕情侶獎，獲粉絲到場送賀及送上兩紮花。談到她昨日於綠地氈上打扮性感，她笑指靚就着，被問是否不介意性感示人？她笑笑口說：「好性感就唔好喇！」
至於對賽果可會滿意？她說：「滿意呀！因為《不懂撒嬌的女人》呢套劇團隊都有攞獎（冇視后失望？）唔會，因為仲有好多個獎，係團體嘅努力！」問到可會對無綫的頒獎禮加強信心？她笑謂：「唔會話冇嘅，對套劇有信心！」
談到她與舊愛洪永城同場，二人卻沒有交流，她說：「其實男女藝人有各自嘅化妝間，咁去到化完妝就要去頒獎禮，都冇機會！（互相恭喜？）冇呀，呢啲在心中啦！」
問到她可有要求不與對方行綠地氈？她說：「冇呢啲安排㗎，邊有得要求㗎！（一齊行ok？）未有人有咁嘅安排喎！」
談到無綫頒獎禮將會延期至明年1月舉行，她直言有聽過，可會擔心競爭再更加激烈？她笑說：「我套劇再拉遠啲囉，因為今年公司50周年，競爭係激烈啲，其實每一年都係咁㗎啦，都唔會知有咩對手，大家都期待結果！」
(on.cc東網)
