陳寶珠、譚炳文、沈芝華、祥嫂噚晚去到尖沙嘴文化中心，欣賞新編粵劇《花木蘭之巾幗英雌耀木蘭》，寶珠姐一班戲迷見到偶像到場時，即大嗌：「寶珠姐嚟啦！」仲嗡到佢實一寶，場面好墟冚。
寶珠姐話囝囝楊天經同太太去咗旅行，順便探外母，有冇呷醋？佢話：「都係去兩個幾星期啫！我都好feel，唔係第一次，約朋友食吓飯睇吓戲，九月有慈善演出。」有冇催天經快啲生BB？寶珠姐話o依家啲後生唔催得，順其自然。恨唔恨抱孫？佢再話：「一半一半啦，o依家社會好亂，風氣又唔好，我覺得做父母、小朋友將來會好辛苦，我諗佢哋自己會有計劃。」
同場嘅炳文哥今年四月曾因為心臟問題，氣喘入院，今日佢撐住把遮到場，神精唔錯，影相時仲舉起V字手勢，不過佢笑住話：「精神唔係話太好㗎咋！我頭先上樓梯都氣喘，呢幾日有幾聲咳。」呢個時候，突然有個戲迷走埋嚟大讚佢keep得好靚，好似六十幾歲咁，炳文哥聽到即笑晒口話：「靚咩嘢，我都八十幾歲人，身體麻麻地，仲行得走得，醫生叫我唔好捱夜，玩得就玩，o依家有配音、廣告、拍戲都仲可以，之前都幫港台拍嘢，好似《糖心風瀑3》，(劉)家豪哥有搵我，叫我幫吓手，八、九點就放我，我都拍咗幾場。」除咗劉家豪，仲有杜琪峯都有搵炳文哥拍戲，不過o依家已經唔再拍，佢坦言：「舊年拍完我都唔制啦，一捱夜補唔番，之前拍港台幾日戲，我都病咗。」
至於佢嘅紅顏知己李香琴琴姐嘅近況，炳文就哥話好耐冇聯絡：「都有十一個月，冇辦法啦！又唔行得唔走得。」之前有傳過琴姐唔係好認得人，呢樣嘢，炳文哥嘆謂：「唔知喎！其實搵佢都冇用啦，可能佢捱緊苦，都費事搵佢喇！」
(蘋果日報)
